काठमाडौँ :- काठमाडौँ उपत्यकाका बागमती र त्यसका सहायक नदी किनार तथा सरकारी–सार्वजनिक जग्गा अतिक्रमण गरी निर्माण गरिएका अवैध संरचना हटाउने अभियानलाई तीव्र पारिएको छ।
सहरी विकास मन्त्रालय, जिल्ला प्रशासन कार्यालय काठमाडौँ र काठमाडौँ महानगरपालिका को समन्वयमा बूढानीलकण्ठ नगरपालिकाको कपन क्षेत्रमा अनधिकृत रूपमा बनेका संरचना हटाउने काम भइरहेको सहायक प्रमुख जिल्ला अधिकारी मुक्तिराम रिजालले जानकारी दिएका छन्।
उनका अनुसार कपनको साततले, पाथीभरा, तेन्जिङ चोकलगायत क्षेत्रमा अवैध रूपमा बनेका घरटहरा हटाउने कार्य जारी छ। साथै धोबीखोला कोरिडोरअन्तर्गत अनामनगर–देवीनगर, विष्णुमति नदी किनार (बालाजु–माछापोखरी) र तिलगङ्गा क्षेत्रमा पनि अतिक्रमित संरचना हटाउने क्रम चलिरहेको छ।
हालसम्म उपत्यकाभित्र करिब दुई हजार तीन सयभन्दा बढी घरटहरा हटाइसकिएको महानगर प्रहरी बलले जनाएको छ। तिलगङ्गा, बालाजु र देवीनगर क्षेत्रमा आज पनि दर्जनौँ संरचना भत्काउने काम भइरहेको छ।
प्रधानमन्त्री बालेन्द्र शाह को निर्देशनपछि गत शनिबारदेखि उपत्यकाभित्र अतिक्रमित बस्ती तथा संरचना हटाउने अभियान सुरु गरिएको हो। यस क्रममा थापाथाली, सिनामङ्गल–गैरीगाउँ र भक्तपुरका मनोहरा क्षेत्रका संरचना पनि हटाइएको थियो।
प्रभावित परिवारलाई अस्थायी रूपमा कीर्तिपुर, बालाजु, भक्तपुरलगायतका ‘होल्डिङ सेन्टर’मा राखिएको छ। सरकारले वास्तविक भूमिहीन तथा सुकुमवासीको पहिचान गरी दीर्घकालीन व्यवस्थापनका लागि प्रक्रिया अघि बढाएको जनाएको छ।
तपाईको प्रतिक्रिया
सम्बन्धित खवर
